З рога ўсяго многа

        Святкаванне Міжнароднага дня роднай мовы стала традыцыйным мерапрыемствам для нашай бібліятэкі. Не толькі ў гэты дзень, але і  на працягу цэлага тыдня, бібліятэка запрашае сваіх чытачоў на цікавыя мерапрыемствы, прысвечаныя нашай роднай, матчынай мове. Так, адкрыццём Тыдня роднай мовы стала інтэрактыўная акцыя “Добра ранак! Трымай абаранак!”. Удзельнікі акцыі, наведвальнікі аддзела па рабоце з дзецьмі, з задавальненнем далучаліся да конкурсаў і віктарын інтэрактыўнага кутка: успаміналі беларускія прыказкі і прымаўкі, перакладалі словы на родную мову, спаборнічалі ў спрыце хуткавымаўлення, знаёміліся з навінкамі літаратуры сучасных беларускіх аўтараў. А ўзнагародай за добрыя веды роднай мовы былі, канешне, абаранкі.

          22 лютага для самых маленькіх нашых чытачоў была арганізавана казачна-літаратурная гадзіна “З рога ўсяго многа”, удзельнікамі якой сталі выхаванцы дзіцячага садка №3. Хлопчыкі і дзяўчынкі пазнаёміліся з дзяўчынкай-беларускай Надзейкай. Разам з ёй успомнілі ветлівыя словы на роднай мове, разгадвалі загадкі з саламянага капелюша, гулялі ў гульню “Нос, нос, нос, лоб”. Завяршылася мерапрыемства праглядам казачнай пастаноўкі “Каза-манюка” ў выкананні лялечнага тэатра “Каласавічок”.